Կոնգրեսական Թայթուսն առաջարկում է համատեղ մերժման բանաձև՝ Թուրքիային շարժիչների վաճառքն արգելափակելու նպատակ

Վաշինգտոն — Ամերիկայի հայկական համագումարը (Համագումար) ողջունում է կոնգրեսական Դինա Թայթուսի (դեմոկրատ, Նևադա) կողմից այսօր ներկայացված համատեղ մերժման բանաձևը, որով առաջարկվում է արգելափակել վարչակազմի առաջարկած 700 միլիոն դոլար արժողությամբ General Electric F-110 ռեակտիվ շարժիչների վաճառքը Թուրքիային։

Բանաձևով կարգելվի Զենքի արտահանման վերահսկման ակտի համաձայն հունիսի 24-ին Կոնգրեսին ներկայացված արտասահմանյան ռազմական վաճառքի առաջարկը, որը վերաբերում է Թուրքիայի տեղական KAAN ինքնաթիռաշինական համակարգում F-110 շարժիչներն ինտեգրելու համար անհրաժեշտ նյութական և տեխնիկական տվյալներին։ Զենքի արտահանման վերահսկման ակտի համաձայն՝ Կոնգրեսն ուներ 15 օր հունիսի 24-ի ծանուցումից հետո՝ մերժման բանաձև ներկայացնելու համար։

Այս քայլը տեղի է ունենում այն ​​​​ժամանակ, երբ Թուրքիան շարունակում է պնդել F-35 համատեղ հարվածային կործանիչների ծրագրին իր վերադարձի հարցում, որից այն հեռացվել էր 2019թ․-ին, երբ ձեռք բերեց ռուսական արտադրության S-400 հակաօդային պաշտպանության համակարգը՝ խախտելով ԱՄՆ օրենքը։ Թուրքիան նաև խիստ պատժամիջոցների ենթարկվեց՝ «Ամերիկայի հակառակորդներին պատժամիջոցների միջոցով հակազդելու մասին» ակտի (CAATSA) համաձայն։

Այս շաբաթ Թոմ Լանթոսի անվան մարդու իրավունքների հանձնաժողովի լսումների ժամանակ Մերձավոր Արևելքի ֆորումի քաղաքականության վերլուծության տնօրեն Մայքլ Ռուբինը զգուշացրեց, որ առաջադեմ ռազմական տեխնոլոգիաների փոխանցումը Թուրքիային «նույնքան վտանգավոր է, որքան Ամերիկայի ռազմական տեխնոլոգիաների և առևտրային գաղտնիքների տրամադրումը Չինաստանին», հղում անելով Էրդողանի՝ Թուրքիայի տեղական KAAN կործանիչ ծրագրի տեխնոլոգիան հակադարձ ինժեներական մշակման նկրտումներին։

«Զգայուն ամերիկյան պաշտպանական տեխնոլոգիաներով Թուրքիային պարգևատրելը, լինեն դրանք F-35-ներ, թե շարժիչներ, որոնք կհզորացնեն նրա հաջորդ սերնդի KAAN կործանիչները, հստակ սխալ ազդանշան է ուղարկում նախագահ Էրդողանին»,- ասաց Կոնգրեսական հարաբերությունների գծով տնօրեն Մարիամ Խալոյանը։

Ամերիկայի հայկական համագումարը հիմնադրվել է 1972 թվականին: Այն ամենամեծ համազգային, անկուսակցական, հասարակական կազմակերպությունն է Վաշինգտոնում, որն օժանդակում է հայկական հարցերի ճիշտ ըմբռնմանն ու լուսաբանմանը: Համագումարը 501(c)(3) կարգավիճակով հարկերից ազատված անդամակցական կազմակերպություն է:

###

NR # 2026-24